12813 Daz buoch kundet uns sus:
12814 daz rîche besaz Justinjânus.
12815 doch er wære ain rihtære guot,
12816 er truoch ze hôhe sînen muot.
12817 die vursten dûht er ze hêre.
12818 alle die êre
12819 die si alle solten tragen,
12820 die wolte der chunich in aine an behaben.
12821 die vursten begunden von im fliehen:
12822 er rihte alzoges ze vorhtlîche,
12823 unz in die vursten begunden nîden.
12824 niemen mahte bî im belîben.
12825 Aine frowen hêt er dâ,
12826 gehaizen Tharsillâ,
12827 diu was ain alsô frumec wîp:
12828 vil dike renerte si im den lîp.
12829 si phlac harte guoter liste:
12830 wie wol si in dike gevriste
12831 mit geben joch mit flêhen!
12832 di aller tiuristen hêrren
12833 enthielt si mit den sinnen,
12834 daz die vursten von den dingen
12835 den chunich nie mahten reslahen.
12836 doch begunden si iz alle ainander clagen.
12837 Der chunich newolte niht lâzen
12838 die grôzen unmâze:
12839 swenne in der zorn begreif,
Page 315
KAISERCHRONIK V. 12840-12900. Diem. 393, 25-395, 19.
12840 der senâtus aller von im entweich:
12841 wande sînen worten
12842 niemen getorste antwurten.
12843 daz gestuont unlange:
12844 der chunich wart bevangen
12845 mit hazze unt mit nîde.
12846 daz waiz er dem wîbe,
12847 si muose sîn harte engelten:
12848 er begunde si slahen unt scelten.
12849 iedoch gehalf ir unser hailant,
12850 daz si iz mit grôzer diemuote wol uberwant.
12851 Tharsillâ diu guote,
12852 mit tugentlîchem muote
12853 bî dem chunige si gelach.
12854 wie guotlîche er ir zuo sprach:
12855 ‘Tharsillâ, liebez wîp,
12856 dû bist mir alse der lîp.
12857 swaz ich dir ze laide hân getân,
12858 sol ich daz leben hân,
12859 ich ergezze dich es gerne.
12860 waz maht uns nû gewerren?
12861 ja nehôrtest dû ê nie gesagen
12862 von dehainem mînen vorvarn,
12863 der ie sô grôz êre gewunne:
12864 mir dienet al mîn kunne,
12865 die vursten muozen mir alle entwîchen.
12866 wâ wart ie chunich sô rîche?
12867 vil grôz ist mîn hêrscaft:
12868 nehain vurste hât die craft,
12869 daz er geande mînen zorn,
12870 er nehabe den lîp verlorn,
12871 daz guot unt die êre.
12872 daz enfraisctes dû von chunige ê niemêre’.
12873 Duo sprach diu guote Tharsille:
12874 ‘got von himel waiz wol mîn willen,
12875 daz mir alzoges lait ist,
12876 hêrre, daz dû so gewaltich pist’.
12877 dô sprah der chunich Justinjânus:
12878 ‘frowe, wi redest dû sus?
12879 daz dir werde aller hailigen haz!’
12880 si sprach: ‘hêrre, niene zurnet umbe daz!
12881 daz wizzen wol alle Rômære:
12882 wæret mir unmære,
12883 ich lieze iuh tuon aldaz ir woltet,
12884 wande ich mich von rehte solte
12885 mit iu, hêrre, betragen.
12886 nû wolt ich iu iwer êre gerne behaben,
12887 alse verre sô ich tohte,
12888 oder wîp iemer gefrumen mahte’.
12889 Dô sprach der chunich Justinjân:
12890 ‘der rede wil ich gerne ain ende haben.
12891 daz dû sprichest, daz ich dir liep sî,
12892 und gihest denne anderhalp dâ bî,
12893 dir sîn unmære mîn êre!’
12894 diu chunigîn rewainde sêre,
12895 si sprach: ‘hêrre, woltest dûz besceidenlîche vernemen,
12896 ich wolt dir der rede gerne ain ende geben’.
12897 Dô sprach der chunich Justinjân:
12898 ‘dû solt sîn iemer danch von mir hân,
12899 wil dû mir die rede wol besceiden,
12900 waz dû wellest der mit meinen’.
Page 316
KAISERCHRONIK V. 12901-12965. Diem. 395, 20-397, 19.
12901 dô sprach diu chuniginne:
12902 ‘ûf dîne genâde ich dinge,
12903 daz iz mir iht gewerre’.
12904 daz verlobete der chunich verre.
12905 Si sprach: ‘hêrre, dû bist ain chunich rîche,
12906 die vursten dienent dir vorhtlîche,
12907 dîn hêrscaft ist alsô grôz:
12908 nu newart nie nehain dîn genôz.
12909 ich wil aver dir wærlîche sagen:
12910 iz enmach niht guot ende haben.
12911 diu minne ist stætich unt guot,
12912 diu vorhte hât misselîchen muot,
12913 vorht unde minne
12914 nemach niemen zesamene bringen.
12915 swer den anderen vurhten muoz,
12916 er getuot es im lîhte buoz.
12917 von diu vurht ich des verre,
12918 daz dir diu grôze vorhte gewerre,
12919 di di vursten ze dir muozen hân.
12920 daz muoz ich iemer wainen unt clagen.
12921 unt wærlîche, hêrre, du nebedenkest dich es enzît,
12922 die ungetriuwen Rômære di benement dir den lîp’.
12923 Der chunich sprach uber lanch:
12924 ‘nû wil ich dirs iemer sagen danch,
12925 da dû ie gewunne di guote.
12926 ich gescaffe ouch mîne huote,
12927 daz mir niemen gescaden nemach
12928 vur hiute disen tach’.
12929 dô sprach diu chunigîn:
12930 ‘hêrre, lâ die rede sîn!
12931 ich wil dir wærlîche sagen:
12932 vor untriwen nemac sich niemen bewarn.
12933 dû hâst, hêrre, den alre maisten scaz:
12934 nu waz ist dir, hêrre, deste baz?
12935 der liget dâ verborgen,
12936 unt lebest dû mit grôzen sorgen.
12937 ist, hêrre, daz dû nû alsô restirbest,
12938 oder swelhes tôdes dû vur wirdest,
12939 mîne friunt wellent sîn nehain rât hân,
12940 si negeben mich ainem anderen man, —
12941 ist iz mir lait oder liep,
12942 dar umbe nelâzent si iz niet —
12943 der zevuoret allen dînen scaz.
12944 hêrre, nû gedenke an daz:
12945 du negewinnest sîn frum noch êre
12946 neweder ze lîbe noch ze sêle.
12947 nû wærest dû mir unmære:
12948 ich enruochte waz dîn gescæhe.’
12949 Dô sprach der chunich Justinjân:
12950 ‘alse lange ich daz leben hân,
12951 ich lône dirs iemer getrûwelîche.
12952 nu gebiut uber al mîn rîche,
12953 in lande joch in diete
12954 soltû dich micheler êren nieten.
12955 daz ist der mîn wille.
12956 nû sprich, dû guote Tharsille:
12957 maht dû mit dînen guoten sinnen
12958 mich iemer wider bringen,
12959 daz ich behabe mîn êre,
12960 vil gerne volge ich dîner lêre’.
12961 Dô sprach diu chunigîn:
12962 ‘hêrre, daz sol in dînen hulden sîn.
12963 jâ hôrt ich mînen vater sagen,
12964 daz unser vorvarn,
12965 swenne chômen hôhgezîte,
Page 317
KAISERCHRONIK V. 12966-13032. Diem. 397, 20-399, 21.
12966 so besanten si sich wîten.
12967 wirtscefte si phlegeten,
12968 ir mannen si gebeten.
12969 hêrre, nû nâhet der ôstertach:
12970 nu gebiut dû dîne wirtscaft,
12971 dînen mannen haiz dû wol dienen,
12972 dâ mit solt dû si aller êrist lieben.
12973 vorder si zu dîner kemenâten:
12974 swaz si dir dâ râten,
12975 des solt dû gerne volgen.
12976 dannen gewinnest dû manigen holden,
12977 der dir ê vîant was,
12978 unt getrowent dir ie baz unt baz.
12979 Hêrre, swennez denne kome ze dem jungisten tage,
12980 sô tuo als ich dir sage:
12981 so di vursten urloup wellen nemen,
12982 sô solt dû in hêrlîchen geben:
12983 haiz dîn golt vur tragen,
12984 des wir guote state haben,
12985 haiz den vursten geben allen,
12986 den hêrren unt den mannen
12987 joch den ir holden.
12988 unt wil dû mînes râtes volgen,
12989 ich bekêre dir alle di vursten;
12990 daz si ie wider dich geworhten,
12991 daz bechêre ich dir ze stætlîchen minnen.
12992 sô maht dû samfte dîn êre wider gewinnen.
12993 diu vorhte haizet den man fliechen,
12994 diu minne haizet in belîben,
12995 diu vorhte haizet in enwec gân,
12996 diu minne haizet in bistân,
12997 diu vorhte haizet in allez widerstreben,
12998 diu minne haizet in mit êren leben’.
12999 Dô volgete der chunich hêre
13000 sînes wîbes lêre:
13001 ze Rôme in der stat
13002 gebôt er aine wirtscaft.
13003 dar kômen di vursten in dem rîche,
13004 er enphie si harte wirdeclîche,
13005 er habete si mit grôzen êren,
13006 sô iz wol gezam den edelen hêrren.
13007 alse diu wirtscaft ende genam,
13008 der chunich hiez die gebe vur tragen:
13009 manigen bouch rôten,
13010 manigen pfellel braiten,
13011 scuzzelen unt näpfe,
13012 die wol gestainten kopfe.
13013 gebet er in allen
13014 von manne ze manne,
13015 unz si alle samt jâhen,
13016 di in der wirtscefte wâren,
13017 daz sie nie gesæhen
13018 gebe alsô mære.
13019 sô sprach der hin ze dem:
13020 ‘alse lange sô ich leben
13021 sô wil ich die gebe iemer dienen’.
13022 under in newas duo niemen,
13023 si nespræchen alle gelîche,
13024 si newolten im niemer geswîchen,
13025 noch niemer ûzer sînem dienste komen.
13026 si begunden alle den chunich loben.
13027 da verlkêrte sich diu vorhte in die minne.
13028 daz gemachete Tharsillâ diu chuniginne.
13029 Justinjânus der mære,
13030 der Rômære rihtære,
13031 der staich von tugenden ze tugenden,
13032 unz er wart sô wol megende.
Page 318
KAISERCHRONIK V. 13033-13093. Diem. 399, 22-401, 13.
13033 daz macheten im sîne willige man,
13034 daz im niht nemahte widerstân.
13035 dô riht er duo sîn saitspil
13036 unt ander maniger tugende vil,
13037 der der hêrre phlegete
13038 die wîle daz er lebete.
13039 Ze aller jungest kom iz sus,
13040 daz der chunich Justinjânus
13041 gehofescet mit ainer frouwen:
13042 die beslief er tougen.
13043 ir man der hiez Marcellus,
13044 sîn pruoder hiez Theodôsîus.
13045 als er vraiscte daz,
13046 daz im daz wîp gehônet was,
13047 er sprach in sînem muote.
13048 ‘sam mir got der guote!
13049 iz wirt im hiute disses tages ze laide’.
13050 dannen slaich er altersaine.
13051 der chunich was mit sînen mannen
13052 an sîn gerihte gegangen;
13053 er begunde dar zuo nâhen,
13054 dâ si alle umbe in wâren.
13055 daz swert er durch in stach,
13056 daz wort er vermezzenlîche sprach:
13057 ‘dich hât der tievel betrogen,
13058 du gehôndest mir mîne konen,
13059 du nebehuorest ouch niemer nehaine mêre.
13060 vîl liep wâren mir mîn êre
13061 di wîl ich ir selbe pflach.
13062 iz ist ouch hiute dîn jungister tach’.
13063 daz rîche hêt er vur wâr
13064 rehte sibendehalp jâr
13065 unt zwelf tage mêre.
13066 alsô resluoch in der hêrre’.