By þe king Worshipful fader yn god: oure right trusty and welbeloued / We grete yow wel / And for asmuche as we haue a maner e
of dowte / whether kynwolmersh occupie clerely and wiþ owte scrupule / þospital of saint Antony by oure yifte or noo /
for to eschewe þe peril yn conscience / þat myght be vnto vs by þe yeuyng / and to hym (by)þe
resceyuyng of þe said hospital / þat god defende / on lasse þan þe title wher clere yn lawe and conscience. We wol
ye do make a patent vnder oure greet seel vnto þe said kynwol mersh of þe Deanee of saint martin(es) grande
yn London. Takyng furst of him souffissante seurtee þat he shal be redy al tymes to resigne þe said hospital / whan vs likeþ
to commande hym / And yf hit be foun(d)þat noo scrupule be yn oure yifte. þat we made vnto hym of þ e
said hospital / wherof we wolde ye sent vs worde yn al goodely haste . þan we wol þat kynwolmersh chese to kepe / stille
whether hym haþ leuer þe forsaid De(anee) or hospital / And If hym haþ leuer þe Deanee / and to leue
þospital we holde vs content / but þan hit is oure wille / þat þow he kepe stille þospital wiþ te Deanee
for a tyme / to þat we haue disposed þerfore / þ at he dispende not þe Reuenues and comoditees of þe said
hospital / but kepe þaym stille hooly vnto oure comyng hoom with goddes grace. And If he wol perauanture holde
stille þospital if hit stande clere. we wol he fynde semblable seurte to resigne þe Deanee ayein into oure handes And
god haue yow in his keping. Yeuen vnder oure signet in oure town of Mante þe xx. day of Iuyn S (Signed) (Shir)yngton

   
Note: [Calendared Kirby 867. Grant of deanery to Kynwolmersh 1 July 1419, CPR 1416-22, p. 218.] [stained]