Paston family. Paston letters and papers of the fifteenth century, Part I [a machine-
readable transcription]
Electronic Text Center, University of Virginia Library
|
Table of Contents for this work | | All on-line databases | Etext Center Homepage |
TO JOHN PASTON I 1449
To John Paston be þis letter delyueryd.
Soon, I grete 3ow wel wyth Goddys blyssyng and myn; and I latte 3ow wette þat my cosyn Clere wrytted to me þat sche spake wyth Schrowpe aftyre þat he had byen wyth me at Norwyche, and tolde here what chere þat I had made hym; and he seyde to here he lyked wel by þe chere þat I made hym. He had swyche wordys to my cosyn Clere þat lesse þan 3e made hym good chere and 3af hym wordys of conforth at London he wolde no more speke of þe matyre. My cosyn Clere thynkyth þat it were a foly to forsake hym lesse þan 3e knew of on owdyre as good ore bettere, and I haue assayde 3owre sustere and I fonde here neuer so wylly to noon as sche is to hym, 3yf it be so þat his londe stande cleere. I sent 3ow a letter by Brawnton fore sylke and fore þis matyre be-fore my cosyn Clere wrote to me, þe qwyche was wrytten on þe Wednysday
-31-
nex3t aftyre Mydsomere Day. Ser Herry Ynglows is ry3th besy a-bowt Schrowpe fore on of his do3thteres. I prey 3ow fore-3ette no3th to brynge me my mony fro Horwelbery as 3e com fro London, edyre all ore a grete parte. þe dew dette was at Crystemesse last paste, no thynge a-lowyd, vij li. xiiij s. viij d., and at þis Mydsomere it is v li. more; and thow I a-low hym all his askyng it is but xxvj s. vj d. lesse, but I am no3th so avysyth 3ytt. As fore þe frere, he hath byen at Sent Benettys and at Norwyche, and made grete bowste of þe sewte þat he hath a-3ens me, and bow3the many boxes, to what jntent I wett neuer. It is well doen to be ware at London in drede 3yf he bryng ony syse at Sent Margaretys tyme. I kan no more, but Almy3ty God be owre good lorde, who have 3ow euer in kepyng. Wryten at Oxnede in grete hast on þe Satyr-[day] next aftyre Mydsomere. By 3owre modyre A. P.