Paston family. Paston letters and papers of the fifteenth century, Part I [a machine-
readable transcription]
Electronic Text Center, University of Virginia Library
|
Table of Contents for this work | | All on-line databases | Etext Center Homepage |
TO JOHN PASTON I 1451??
To Meye Barkere of Synt Clementys parys in Norwych, to delyuer to my + master John Paston in haste.
On Thurisday þe wall was mad 3arde hey; and a good wylle be-fore euyn it reyned so sore þat þey were fayne to helle þe wall and leue werke, and þe water is fallyn so sore þat it standyt ondyre þe wall a fote deppe to Ballys warde. And on Fryday after sakeryng on come fro cherch warde and schoffe doune all þat was þere-on and trad on þe wall and brake sum and wente ouer. But I can not 3et wete hoo it was.
-35-
And Warne Kyngys wyfe, as she went ouer þe style, she cursyd Ball and seyde þat he had 3euyn aweye þe waye, and so it preuyt be John Paston is wordys; and after, Kyngys folke and odyr come and cryid on Annes Ball, seying to here þe same. 3ystyrneuyn wan I xul[[d]] goo to my bede þe vycare seyde þat Warne Kyng and Warne Harman be-twyxte messe and matynsse toke Ser Roberd in þe vestry and bad hym sey to me verely þe wall xullde doun a-gayne; and wan þe vycore tolde me I wyste þere-of no worde, nor 3et do, be Ser Roberde, for he syth he were loth to make any stryfe. And wan I cam out of þe cherch Roberd Emundys schewyd me how I was a-mercyde for seute of corte þe laste 3ere vj d., and seyd it was xij d. tylle Warne Kyng and he gat it awey vj d. I send 3ou word how John Jamys was de-menyd at Cromere, to send to Jamys Gressham how he xall be de-menyd. Gaffrey Benchard and Alexander Glouer, heywardys, tokyn a dystresse of John Jamys on þe bond tenement of A. Paston calde Reynaldys in Cromer þe xxviijti 3ere of þys kyng, and W. Goodwyn, baly of Cromer, wyth þe seyd J. Jamys wyth forsse toke awey þe dysstres, wech was ij horsse and a plowe. And Good be wyth 3ou. Be Annes Paston 3oure modyr