Paston family. Paston letters and papers of the fifteenth century, Part I [a machine- readable transcription]
Electronic Text Center, University of Virginia Library

| Table of Contents for this work |
| All on-line databases | Etext Center Homepage |

TO MARGARET PASTON 1458, 08, 10

   To his rythe worchypffull and harthy wellebelouyd suster Margeré Paston, dwellyng jn Norwyche.

   Rythe harthely well belouyd suster, I recomand me, &c.; and I haue receyued 3owre letteres. And as fore myn nevewes, they lerne rythe well bothe, and there gownys and there gere schall be mad for hem acordyng to þe enthenthe of 3owre letter, and all oder thynggys that behouyth on-to here profythe harddely to myn powere. And suster, God 3elde 3ow for 3owre labore fore me for gaderyng of myn mony. And I pray as sone as 3e receyuyth, send it heder be some trusty man, and þat it plese to calle þere-on, &c. Myn suster and myn broder recomand hem to 3ow bothe, and I may say to 3ow in counsayll sche is op-on poyn of mariage so þat moder and myn broder sett frendely and stedfastely there-on, leke as I wothe well 3e wolld and it lay in 3ow as it dothe jn hem, &c. I pray 3ow do 3owre parthe to kall there-on. It were to long to wrythe on-to 3ow all þe maner of demenyng of þis mater, and there-for I haue spoke to Wyllyam Worsetere and to


-157-


Wethewell to tell it 3ow holly as it is. I wothe ryth well 3ow[r] good labore may do moche; and send me word how 3e here as hastely as 3e may.
Item, Howard spak of a mariage be-twex his sone and myn nece Margeré 3owre dothere. It were well do suche materes were nawthe sclawfully laboryd; it is wurchypffull, &c. Send me word. And God haue 3ow in his kepyng. Wretyn at London on Sent Lawrens Day in hast. Be 3owre brodyre Wyllya[m] Paston
Item, [i] send 3ow a letter directyd to Wollysby. I pray 3ow lethe it be delyuered hym as hastely as 3e may, and if 3e come to þis contré I am leke to se 3ow and we schall make ryth mery, I trust.